يوميات أسرة حجازية

يوميات أسرة حجازية

قبل المغربية مع خالة خيرية
تزهم و تنادي إنتي فين يا بدرية

بدرية في السطوح مع علوية
يفرشوا الطراريح و يخشخشوا الناموسية

يا الله يا بنت إنتي و هيا بسرعة شوية
حاضر يا أمي دقايق و نخلص من القضية

واد يا أسعد فين أخوانك البقية
في الزقاق يلعبوا عسكر و حرامية

أزهم عليهم يطلعوا لا تجيهم الجنية
صلي عالنبي يا أمي دي ساعة مغربية

صدقة يا عباااااااااس أطلعوا بلا أزية
طيب طالعين خلاص مع ستي مهدية

مهدية لخيرية أولادك هدول فرفوشية
زفوني في الدرج يقولوا لي ياستنا يا عسلية

عباس مجروح في رجله بقزازة مرمية
وصدقة ببجامة مقلمة وصخة زي الميكانيكية

خيرية .. إيش هادا حسبي الله عليكم شقاوية
مهدية لا تضربيهم عشاني و إنتي رضية

حاضر يا أمي عشانك بس المرة دية
يا الله قدامي إنت وهو أتروشوا من الحنفية

و إنتي يا أمي أجلسي جمب المصلية
عشان إذا أدن تصلي المغربية

و إنتو يابنات يا الله تعالوا نسوي المقلية
و نزبط زلطة الحمر و الفلفلية

بعد المغربية ، يا ولد يا ساتر طريق يا خيرية
أتفضل يا أبو اسعد ما في غير عمتك مهدية

كيفك يا عمة نورتي البيت يا عودة و عنبرية
تعيش يا جوز بنتي كلك ذوق و مفهومية

هيا سموا بالرحمن و نقنقوا من المقلية
و نونو نونو لقمة هنية تكفي مية

أسعد يوشوش أبوه يبغى هدية
ما شاء الله نجح و أتخرج من الثانوية

أبشر يا ولدي بس تجي فلوس الإكرامية
و لا يهمك يبويا ما في مشكلة حصبر شوية

يا واد عباس إيشبها كدا رجلك ملوية
دخلت فيها قزازة يبويا من العصرية

تاني مرة فتح عينك لا أخرملك هيه
ولا أشوفكم تلعبوا حفايا ترى تاكلكم التكرونية

بدرية .. يبويا فين حتودينا هادي الصيفية
و الله يابنتي كالعادة الطايف حي البخارية

الله يسعدك يبويا نبغى أبها البهية
يابنتي أبها بعيدة مرررررة و سفرية

خلاص اللي تشوفوا يا أغلى أب في الدنيا ديه
بنت يا علوية ناوليني الكمر حقي و السديرية

أنا خارج دحين يا خيرية رايح الشامية
أودي صك الوقف حق بيت السليمانية

خلي الأولاد يسبقوني للحرم تحت المكبرية
عشان نصلي العشا و نكسب الفرض سوية

بعد العشا و في السطوح عند المشربية
خيرية تفت العيش في الحليب وبدرية مسلقحة متحنية

هاتي ياعلوية الجبنة البلدي والحلاوة الطحينية
وكمان كم بيضة نسوي شكشوكة في الصينية

لمة حلوة و ظريفة و عيلة عفوية
أتعشو و عليهم بالخير يدوروا عالناموسية

عشان يصحو بدري مع أدان الفجرية
لا سهر لا كسل يومهم كله نشاط و حيوية

فينك يا أيام زمان تشوفي حالنا والفوضجية

ما نعرف راصنا من رجلنا و حياتنا سارت ملوخية

ما نعرف راصنا من رجلنا و حياتنا سارت ملوخية <- هههههههههههههه آهم شي

يسلمووو قممر مآ ننحرمش

ههههههههههه عليكِ بالعافيه // الملووخيه

الله يسلمك ياا عسل لاتحرمينا من طلتك البهيه <<< حجاازيه

اقتباس :

تاني مرة فتح عينك لا أخرملك هيه

ولا أشوفكم تلعبوا حفايا ترى تاكلكم التكرونية

هههههههههههههههههههه

والله هنا فكيت كاي

يسلمو قموره ماننحرم

ههههههههههههه

يسلموا على المروور